meottawa.org

(၈-၅-၂၀၂၃ ရက်၊ နေပြည်တော်)
မြန်မာနိုင်ငံ၊ ကမ်းရိုးတန်းဒေသတွင် ဖြစ်ပေါ်လာနိုင်ခြေရှိသော လေပြင်းမုန်တိုင်း သဘာဝ ဘေးအန္တရာယ် ကျရောက်လာပါက အရေးပေါ် အသုံးပြုနိုင်ရန်အတွက် ဗန်ကောက်မြို့၊ မြန်မာသံရုံး၏ စည်းရုံးဆောင်ရွက်မှုဖြင့် ထိုင်းနိုင်ငံရောက် မြန်မာနိုင်ငံသားများမှ စုပေါင်းလှူဒါန်းသော ထိုင်းဘတ်ငွေ (၁,၀၇၇,၂၆၃) တန်ဖိုးရှိ အသင့်စားခေါက်ဆွဲခြောက်ထုပ် (၁၅၈,၆၄၀) ထုပ်အား နိုင်ငံခြားရေးဝန်ကြီးဌာန၊ ဒုတိယဝန်ကြီး ဦးကျော်မျိုးထွဋ် မှ ၈-၅-၂၀၂၃ ရက်၊ ၁၅၀၀ နာရီတွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါ်သက်သက်ခိုင် ထံ လွှဲပြောင်းပေးအပ်ခဲ့ပါသည်။
အဆိုပါ အသင့်စားခေါက်ဆွဲခြောက်ထုပ်များ တင်ဆောင်လာသည့် ယာဉ် (၂)စီး သည် မြဝတီမြို့မှတစ်ဆင့် ရန်ကုန်မြို့သို့ မေလ ၈ ရက်၊ နေ့လယ်ပိုင်းတွင် ရောက်ရှိလာပါသဖြင့် နိုင်ငံခြားရေးဝန်ကြီးဌာနမှ ညွှန်ကြားရေးမှူးချုပ် ဦးဇော်ဖြိုးဝင်း က ရန်ကုန်တိုင်းဒေသကြီးအစိုးရအဖွဲ့၊ လူမှုရေးဝန်ကြီး ဦးအောင်ဝင်းသိန်းနှင့် ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးမှ ညွှန်ကြားရေးမှူး ဦးသန်းစိုး တို့ထံ လွှဲပြောင်းပေးအပ်ခဲ့ကြောင်း သိရှိရပါသည်။